جويرية والنصف الآخر

جويرية والنصف الآخر

*******************************

جلس الدكتور محمد مع العائلة بعد العشاء يتحدث كعادته يوميا ....وبعد مضي نصف

الساعة قامت زوجته أم أحمد بأمر بناته الثلاث الصغار : زينب وفاطمة وخديجة

بمغادرة الغرفة لانها تريد التحدث هي ووالدهم إلى أختهم الكبرى

جويرية.....اعترضت الفتيات وهن يتغامزن ويتضاحكن على جويرية ولكن الأم

نظرت إليهن نظرة جعلت الدكتور محمد يبتسم وهو يعلم مدى جدية زوجته وحبيبة

عمره رانيا ( أم أحمد كما تحب وتصر أن يطلق عليها ) نسبة إلى أحمد ابنهم الذي

مات وهو صغير ....خرجت الفتيات على مضض فنظرت الأم إلى جويرية وقالت

غاضبة : معقول اللي عملتيه النهارده مع العريس و امه داه؟

جويرية : عملت إيه بس يا ماما أنتي مش شفتيهم عاملين ازاي؟

الأم : عاملين ازاي يعني إيه؟زمان الأم بتنصح ابنها ينسى موضوعك ولا يفكر فيكي

وزمانها بتقوله اجوزك واحده بلسانين؟؟؟؟

جويرية: احضرنا يا بابا أنا بلسانين؟

الأب مداعبا : لا بلسان ونص يا حبيبة بابا ...إيه يا رانيا الحكاية البنت رافضه الشاب

وهي اللي حتتجوز مش احنا...

الأم : داه مش أول شاب ترفضه وانت توافقها يا محمد..

الأب : انا موافقها علشان هي صح العريس اللي فات كان مدخن و أنا ارفض تماما

اجوز بناتي لمدخن داه لا شرعا ولا صحيا ينفع في الزمن داه .

وبعدين العريس بتاع

النهارده لو كان عجبني كنت اقنعت جويرية انما بنتك واعية ومتدينة و بتحكم عقلها قبل

قلبها و أنا شخصيا لو كنت شفته هو او اللي قبله يصلحوا لبنتي كان زمان الوضع

مختلف

الأم : تاني حتقف في صفها و تقول إن حكمي غلط؟

الأب : حكمك مش غلط يا أم أحمد بس متنسيش انتي قلبك قلب أم نفسها تشوف بنتها

عروسة وتشوف أحفادها كمان وبعدين خلينا نسمعها وبعدين نتناقش ..إيه يا جرة

العسل احكيلي يا أمي سبب رفضك العريس ..

جويرية:أولا يا بابا نظراته معجبتنيش مش نظرات إنسان ملتزم يعني الرسول صلى الله

عليه وسلم قال انظر إليها مقالش فصصها كده وابتسامة على وشه كلها سخرية

مرتحتلهاش والا أمه يا إيه اللي عملته داه؟ كان ناقص تاخدني الاوضة جوه تشد شعري

تشوفه عيرة والا حقيقي

يضحك الأب قائلا: فكرتني بماري منيب الله يرحمها في فيلم من بتوع زمان لما أخدت

معاها بندق ولوز وجوز بقشرهم علشان العروسة تكسرهم بأسنانها وشدت شعر

العروسة تتأكد منه ..فاكراه يا رانيا؟

تكتم رانيا ابتسامة وتنظر إلي زوجها وابنتها وتقول: طيب والتحقيق اللي فتحتيه معاه داه

ينفع يا بنتي؟ داه حتى مش من الذوق ولا إكرام الضيف؟؟؟

جويرية : داه زوج المستقبل يا أمي اللي المفروض حاسيب بيتي و أهلي و أقضي معاه

بقية عمري و انا لازم أعرف مدى التزامه علشان انا عايزة اللي يدخلني معاه الجنة

مش النار..

الأم : يعني يقولك باصلي جماعة و أحيانا كتير باكون الإمام تسأليه إن كان بيصلي

الفجر في المسجد؟

جويرية : يا ماما اللي بيصلوا الفجر دول المشائين في الظلمات زي نبينا ما قال عليه

الصلاة والسلام وبعدين هو حجته إيه؟ما بابا دكتور في الجامعة ومشغول اكتر منه

خمسين مرة وبالرغم من داه مشفتهوش فوت صلاة الفجر ولا الجماعة إلا وهو مريض

ومش أي مرض ..

الأم : يا بنتي ما تبصيش لكل عريس وتقارنيه بأبوكي علشان صوابع إيديكي مش زي

بعضهم..

جويرية :ماما يا حبيبة أنا باقارن في التدين مش الصفات ..وبعدين كل ما كان ملتزم

وعارف ربنا كلما راعى ربنا فيا ..حضرتك شفتيه لما رد على امه رد عليها ازاي

بحدة لما قاطعتنا واحنا بنتكلم؟ داه شكله مدلل وهي بتغفره كتير وداه مينفعنيش.داه

يخليني أرفضه تماما يا ماما دي أمه ازاي يعاملها كده في بيت غريب امال حيعمل فيا

إيه انا بقى لما يتقفل علينا باب واحد؟؟

الأب :كفاية نقاش الموضوع اتقفل و أساسا يا ام أحمد انتي نفسك حسيتي برفضي

بسبب كلامه داه قعد يشكر في نفسه علشان يحسسنا إنه ملتزم وبعدين هو مش من

مستوانا الإجتماعي ..أنا باتكلم عن الدين والأخلاق مش باتكلم عن الفلوس وانتي

عارفه قصدي كويس..

جويرية:ماما يا حبيبتي بالله عليكي حضرتك مش شايفه جدتي ازاي جمعتك انتي

واولادها في العمارة هنا وازاي بتعاملوها؟كل واحد فيكم يعدي عليها علشان ينول

رضاها؟؟هي ربتكم صح دينيا وعرفتوا إن رضا الله من رضاها ...داه حتى بابا اليوم

اللي يفوت فيه كوب الشاي باللبن معاها بعد صلاة الفجر بيكون زعلان..

الأم : خلاص يا بنتي ربي يقدملك اللي فيه الخير قومي علشان ننام و أنا يومي كان

طويل النهارده وتعبانه

جويرية : حاضر بس عايزة بابا في موضوع يخص الجامعة

..

الأم : طيب بس متأخريش بابا علشان تعرفوا تقوموا تصلوا القيام والفجر.

جويرية : من عيوني يا أحلى ماما ..تصبحي على خير

الام: ربي يخليكوا ليا ولا يحرمني منكم أبدا.

جويرية والأب في صوت واحد : ويخليكي لينا يا رب.

جويرية : بابا حضرتك عارف إن أنا لازم أقدم مشروع التخرج بتاعي الشهر الجاي

قبل الإمتحانات و هو عن مكتبة كلية والخدمات اللي بتقدمها للطلبة خاصة طلبة

الدراسات العليا..

الأب : وطبعا علشان المحسوبية حتختاري كلية الصيدلة علشان بابا يساعدك ووووو

تضحك جويرية قائلة : يا بخت من كان أبوه في كلية الصيدلة ...بس يا بابا متقلقش أنا

مش حاقول لحضرتك اعملولي البحث بدلا مني والكلام اللي بيحصل أحيانا ...أنا بس

عايزة حضرتك تتكلم عن مشروعي مع معيدة من المعيدات البنات ياريت وتقابلني بيها

و اجمع منها البيانات

الاب: أنا معنديش معيدات بس متقلقيش انتي اكتبيلي اللي عايزاه من بيانات اشوفها مع

أمينة المكتبة ومع المعيدين عندي و لما نجهزها تبقي تيجي معايا إن شاء الله

جويرية: تسلم إيديك يا بابا يا احلى بابا..يلا انا حاقوم اكتب لحضرتك ورقة البيانات

المطلوبة و حاديها لحضرتك الصبح قبل ما ننزل الجامعة إن شاء الله...تصبح على

خير يا بابايا

الأب : تصبحي على جمال يا جرة العسل ..

جويرية : جرة العسل دي بحبها قوي لما حضرتك تدلعني بيها باعرف انك راضي عني

ومش زعلان ..حضرتك حتدلعنا ونيجي نتجوز مش حنلاقي اللي يدلعنا ابدا كده.

.

الأب : مين قال كده دول حيكونوا ازواج بناتي الحبيبات مش حيقدر واحد فيهم إلا يحبكم

ويدلعكم إن شاء الله

جويرية : دعواتك يا بابا

.

الأب : قومي نامي يا ام لسان ونص علشان أعرف أقوم أصلي بعد كام ساعة

تقبل جويرية رأس أبيها وتذهب إلى غرفتها لتحضير الأوراق.

2

يدخل دكتور محمد إلى غرفته بالكلية ويطلب من الساعي أن يستدعي له دكتور أحمد

بعد انتهاؤه من محاضراته ويقرأ الورقة التي اخذها من جويرية والتي كتبتها بخط

منمق ومرتب بالعديد من الألوان ويبتسم لطريقة ابنته في الترتيب والتوضيح ..يدخل

دكتور أحمد محييا دكتور محمد

دكتور محمد : وعليكم السلام ورحمة الله وبركاته أهلا يا دكتور أحمد تعالى عايزك في

موضوع

.

أحمد : خيرا يا دكتور ؟

دكتور محمد: بقى يا سيدي بنتي الكبيرة جويرية في سنة رابعة كلية آداب قسم وثائق

ومكتبات وعايزة مننا خدمة من المكتبة هنا في الجامعة.

أحمد: ما شاء الله تسمحلي يا دكتور أقولك حضرتك تبان أصغر من إن يكون ليك بنت

في سنة رابعة في الجامعة

محمد: أنا اتجوزت بعد تخرجي مباشرة دي نصيحة والدي نصحني بيها الله يرحمه إن

رسولنا قال لنا إن من يستطع الزواج فليتزوج وفعلا كانت نعم النصيحة..المهم يا

دكتور دي ورقة طلبات جويرية هي عايزة تعرف بيانات معينة كتبتها ووقت ما

تخلصها على مهلك قولي علشان هي تدرسها و تعمل مشروعها وتيجي بنفسها تشوف

المكتبة وتقابل الأمناء والمعيدين والمعيدات

يقرا أحمد الورقة ويرد : هي حضرتك كاتبة بأسلوب ما شاء الله ييسر عليا كتير و أنا

حاعمله و اشوف برضه الزملاء أسألهم بحيث لما هي تيجي اكون عملتها شبه استفتاء

زي ما هي قايله و حاكتبه واطبعه عالكمبيوتر ألا أنا خطي يكسف ومش حتعرف تقرا

كلمتين على بعض

يضحك الأب ويسأل أحمد : إلا يا دكتور حاختبرك اختبار تعرف من هي جويرية؟وإيه

معناه؟

أحمد : داه امتحان تمهيدي ماجستير يا دكتور؟ جويرية هي السيدة جويرية أخر

زوجات رسول الله صلى الله عليه وسلم و إسمها الحقيقي كان :برة وغيره الرسول

فأسماها جويرية يعني تصغير جارية

محمد: وليه الرسول صلى الله عليه وسلم غير إسمها؟

أحمد:لأنها كلمة تحمل تزكية ويكره التسمية بها

.

محمد : ربنا يبارك فيك يا دكتور ويارب تجاوب كده في امتحاناتك الجاية و أنا أضمن

لك الإمتياز مع مرتبة الشرف

أحمد : الله يبارك فيك وفي عمرك و أولادك يا دكتور

.

محمد: بناتي يا سيدي أنا عندي أربعة من البنات : جويورية وزينب وفاطمة

وخديجة..كان عندي ولد بس توفاه الله وهو طفل صغير

..

أحمد : منتظرك في الجنة يا دكتور بإذن الله تعالى ..ربي يصبرك ويخليلك البنات و

يخليك ليهم

محمد : اللهم آمين

..

فيما بعد يجلس الأب على مكتبه متفائلا خيرا سائلا الله أن يجمع بين ابنته وأحمد ( ابن

الدكتور عبد الجواد رحمه الله - الذي كان معيدا أثناء سنوات دراسته والذي علمه حب

الدراسة والعلم وجعل منه كل هذا دكتورا جامعيا موهوبا

3

تجلس جويرية مع أخواتها وجدتها يتضاحكن على موضوع العريس وتبدا أخواتها في

مداعبتها ومعاكستها بأنها تفوقت في تطفيش العريس بكل يسر وسهولة كما فعلت في

المرات السابقة فتنهرهن الجدة قائلة : داه النصيب يا بنات ...لسه ربنا مش رايد لها

..ربي يطمني عليكم انتم واولاد وبنات حسين و محمود ولادي و اشوفكم عرايس قبل ما

أموت

البنات يحتضن الجدة و يستحلفوها بالله أن لا تتحدث عن أمر موتها ثانية داعيات الله أن

يمد في عمرها سنوات و سنوات.

فاطمة : بس يا ننا الزمن داه الشباب حالهم صعب قوي ...لو تشوفيهم في الجامعة

تتكسفي وتخبي وشك ...اللي لابس تيشيرتات ملصقة واللي لابس بنطلون ساقط واللي

لابس سلاسل وخواتم وحالق شعره أو عامل ذيل حصان ورابط شعره بأستك

الجدة : باشوفهم في التلفزيون يا بنتي وباشوف كمان بنات حالهم يحزن وباتحسر على

كل أم سايبه بنتها نازله كده بره بيتها ..حتى البنات المحجبات في منهم بنات زي ما

نبيكم المصطفى قال : كاسيات عاريات..

زينب : يارب يا مقلب القلوب ثبت قلوبنا على دينك

.

خديجة : الحمدلله إننا طلعنا في بيت يعرف ربنا وتعاليمه ويحافظ عليها ويعلمها لأولاده و

 أحفاده ..دي نعمة يا ننا مش كل الناس فيها وربي يهدينا كلنا..

جويرية : صح كلامك يا خديجة انتي أينعم أصغرا عمرا بس أكثرنا حكمة يا حكيمة 

زمانك انتي يا قمر

الجدة : يلا يا بنات قوموا شوفوا مرات خالكم ساعدوها شوية ألا خلاص على أخرها في

 الحمل ومش بتقدر على شغل المطبخ ساعدوها وانزلوا على بيتكم على طول.

جويرية : حاضر يا ننا ارتاحي انتي بس واحنا حنساعد مرات خالي وبعدها ننزل نحضر

 الغدا علشان ماما مع طنط هدى في المستشفى بتعمل عملية

الجدة : ربنا يقومها بالسلامة ويعافيكم من كل سوء يا أحلى بنات..لما تطمنوا عليها

 طمنوني .

خديجة : من عيننا يا أحلى ننا في الدنيا بحالها .

الجدة : ربي يخليكم ليا ولا يحرمني من طلتكم الحلوة عليا .

البنات : آمين

الجدة : ابقوا اطلعوا بعد الغدا اطمنوا على ابن خالكم الصغير ألا أبوه بيقولي إنه وقع

 ورجله بتوجعه شوية بس الدكتور طمنهم وقال كدمة .

زينب : حاضر يا ننا السلام عليكم

الجدة : وعليكم السلام ورحمة الله وبركاته

4-

يجلس أحمد على الاب توب ....بعد عودته من صلاة الفجر وانتهاؤه من تلاوة بعض آيات

 القرآن و أذكار الصباح ..لكتابة البيانات التي طلبها منه الدكتور محمد لابنته جويرية ..و

 أخد ينظر إلى الورقة المكتوبة بخط يدها ويتمنى لو كان يستطيع تحليل شخصية هذة 

الفتاة من خط يدها كما يقوم البعض ...ولكنه خرج بنتيجة أنها فتاة منظمة وذات عقلية 

جيدة ومثقفة وتحب الألوان فالورقة مكتوبة باللون الأخضر و الاحمر والأسود والأزرق

 بصورة محببة إلى النفس .....يبتسم أحمد متهما نفسه بالبلاهة و يبدأ في كتابة ما وصل 

إليه من معلومات عن المكتبة سواء ما يخصه أو ما يخص زملاؤه الذين ساعدوه بسعة 

صدر من أجل دكتور محمد الذي يحبه جميع من بالكلية بداية من أصغر موظف إلى 

العميد ...تدخل أمه ومعها كوبان من الشاي باللبن بالحبهان وبسكويت وكعكات صغيرة 

تصنعها بيداها من أجله ...فياخذ منها الصينية ويداعبها قائلا : تسلم الأيادي يا ست ماما 

....أنا اللي كان مفروض اعمل الشاي باللبن النهاردة و اجيبه لغاية عندك ...الدور عليا

تبتسم الأم وتقول : أنا لقيتك مشغول فقلت اقوم انا خصوصا إني عايزة اتحرك علشان 

جسمي يتدفى شوية

أحمد : تعالي يا ماما أقعدي في سريري واتغطي بالبطانية وانتي بتشربي الشاي باللبن ...

 حتاخدي دور برد والا إيه؟

الأم : لا يا أحمد بس انت عارف الوقت داه من السنة بارد قوي ...شهر طوبة بقى على 

رأي جدتي يخلي الشابة كركوبة 

يضحك أحمد ويداعبها بأنها مش كركوبة قوي فتضحك الأم وتقول له : كمل شغلك يا حبيبي ربي يوفقك لما يحب ويرضى

أحمد : في الحقيقة داه مش شغلي داه بيانات طلبها دكتور محمد لبنته علشان بتعمل 

مشروع التخرج بتاعها في مكتبة الجامعة عندنا 

الأم : ما شاء الله كبرت بناته كده؟

أحمد : أه يا ماما دي في سنة رابعة حتتخرج إن شاء الله السنة دي

الأم : انت عارف أنا اتعرفت على زوجة دكتور محمد وكانت لسه يادوب عروسة جديدة

 بس سفرنا السعودية بقى خلاني انقطع عنها وادي السنين عدت وبنتها بقت عروسة ما 

شاء الله

أحمد : سبحان الله مكنتش اعرف الموضوع داه 

الأم : انت عارف باباك الله يرحمه كان معيد وهو اللي كان متفائل خير بدكتور محمد

وعرف إنه حيكون رجل مهم في مجال شغلكم وفعلا ظنه مخيبش والراجل يستاهل 

التشجيع 

أحمد : فعلا يا ماما لا أزكي على الله أحد أحسبه على خير ...مثال للرجل و الاب قبل ما

 يكون نائب رئيس جامعة

الام : ربنا يكرمه ويكرمك يا حبيبي وأشوفك أحسن واحد في الدنيا انت واخواتك

أحمد : آمين آمين آمين

5-

تذهب جويرية إلى الجامعة مع أبوها الذي امضى الوقت عند صلاة الفجر داعيا الله أن 

تلتقي أرواح ابنته و أحمد وتتوائم فهو يحب هذا الشاب ليس فقط لأنه ابن أعز الناس لديه

 ولكن لأنه كان يتمنى لو يرى ابنه أحمد رحمه الله مثل دكتور أحمد...يتذكر محمد ابنه 

الصغير الذي مات في الخامسة من عمره إثر فيروس غريب جعل حرارته ترتفع بدون 

توقف حتى أثرت على مخه الصغير وقلبه فتوقفا عن العمل و استرد الله وديعته 

تقطع جويرية أفكاره وتسأله سؤال كما لو كانت تقرأ ما بنفسه أو تشاركه أفكاره :بابا هي 

ليه ماما مش بتحب حد يقولها يارانيا؟وبتفضل أكتر أم أحمد؟

محمد: أنا و أمك قبل ما نخلفكم قررنا نسميكم أسماء إسلامية وهي كانت تضحك وتقولي 

يعني مش كانت أمي و أبويا يسموني اسم عدل بدل رانيا دي؟

و أنا أضحك و أقولها هو فيه أحلى من إسم رانيا داه حتى معناه جميل

جويرية : يعني إيه إسم رانيا صحيح يا بابا؟

الأب

 رانيا اسم زهرة وفي اللغة يعني القرب

من ران يرنو

جويرية : بابا حضرتك مقلتليش صحيح مين اللي جمع لي البيانات دي وكتبها عالكمبيوتر 

الأب : معيد عندي في الكلية يا جويرية ..ربي يكرمه هو اللي جمع لك البيانات دي و

عملك الإستفتاءات و كتب كل داه عالكمبيوتر رغم إنه المفروض عنده امتحانات نهائي

 الماجستير قريب

جويرية : أكيد يا بابا علشان حضرتك محدش يقدر يرفض لك طلب علشان انت رجل

 جميل.

الأب : إيه رجل جميل دي يا بنت؟

جويرية: دي كلمة ننا دايما تقول على جدو الله يرحمه رجل جميل من زمن جميل.

يطرق الباب ويدخل الساعي ليستأذن في دخول دكتور أحمد

يدخل دكتور أحمد ويلقي السلام على دكتور محمد وابنته جويرية .ويقوم الأب بالتعريف

يتطلع أحمد إلى جويرية و محييا ثم يسألها عن الأوراق التي أعدها من أجلها وهل كانت

 وافية لها ومفيدة أم لا؟

جويرية : جزاك الله خيرا .بجد حضرتك ساعدتني كتير و معتقدش اني كنت حاقدر أعمل

 ربع اللي عملته لو كنت لوحدي

أحمد : مافيش أي حاجه أنا وزمايلي عيوننا علشان دكتور محمد هو بس يطلب واحنا

 ننفذ

محمد: ربنا يبارك فيك يا أحمد .ويجازيكم كل خير ..يلتفت محمد إلى ابنته قائلا : ها يا

 جويرية تحبي تروحي المكتبة دلوقتي علشان أنا عندي مقابلة بعد دقائق ..حاتمشى معاكي 

أنا و أحمد لغاية مكتبة الدراسات العليا و هو حيعرفك على أمينات المكتبة ومسؤولة

 الكمبيوتر وبعض المعيدات اكيد حيكونوا في المكتبة .

جويرية : حضرتك مقلتليش عندك مقابلة كنت خليت الميعاد يوم تكون فاضي فيه.

محمد : أنا ساعه وحارجعلك ما أنا و أحمد مش فاضيين نقعد جنبك لغاية ما تخلصي كل

 حاجاتك والا إيه يا أحمد؟

أحمد مبتسما : حضرتك أنا مافيش ورايا حاجه برة المكتبة وحاقعد في المكتبة مع الزملاء

 أشوف حاجات خاصة بالماجستير و لو الأنسة احتاجت أي شيء حاكون موجود .

محمد : طيب يلا توكلنا على الله.

6-

تعود جويرية إلى المنزل مع والدها بعد الإنتهاء من جزء كبير من البيانات التي تريد

 الحصول عليها وفي السيارة يسألها والدها : كله تمام يا جرة العسل؟

جويرية: الحمدلله يا بابا وفقت جدا ومش باقي غير مرة كمان الأسبوع الجاي حاقابل أمينة

المكتبة حاعمل معاها مقابلة شخصية و اسألها شوية أسئلة عن المكتبة ووو و ابتدي بقى 

اجمع كل داه واحطه في البحث بس ربي يسلم يا بابا مش بحب أبدا اتكلم ادام الناس

 واتناقش في البحث بقى ويعصروني أسئلة .

الأب: انتي سيبي كل حاجه على الله و اعملي كل شيء بنظام و دقة و بأمر الله ربي

 حييسر كل شيء و حتوفقي .بس قوليلي أحمد عمل إيه؟ وساعدك في المكتبة وهل فيه أي

 حد ضايقك؟حسب ساعات طلاب الدراسات العليا ما يصدقوا بنت حلوة وجميلة غريبة

 تدخل عندهم

تضحك جويرية وتقول : إيه يا بابا هم وحوش؟ بالعكس والله محدش ضايقني وكلهم كانوا

 ذوق جدا والدكتور أحمد عرفني على أمينة المكتبة وهي عرفتني على معيدات ربي 

يكرمهم كانوا منتهى الذوق والتجاوب معايا وساعدوني جدا

الأب: و أحمد؟

جويرية: الدكتور أحمد بعدما عرفني على أمينة المكتبة راح قعد مع زميل له أو اتنين وقعد

 يشتغل بس قالي لو احتجت أي حاجه اندهله يساعدني.

الأب: ربنا يكرمه شاب على خلق ودين و أنا كنت عارف إنه أحسن واحد ممكن يساعدك

 وسط الشباب اللي عندي داه أبوه الله يرحمه كان رجل على خلق ودين واللي خلف 

مماتش فعلا

جويرية تصمت وتتذكر الدكتور أحمد ....بالفعل يبدو عليه الأخلاق والإلتزام حتى أنه يكاد

 يكون نظر إليها ...انه طويل القامة باعتدال وقامته رياضية توحي بأنه يمارس الرياضة 

بانتظام وهو هاديء وذا صوت رخيم ..يا ترى هو ملتزم وعلى خلق فعلا والا زي 

العريس اللي جه الشهر اللي فات؟تحدث جويرية نفسها : ايه داه فيه إيه؟ عريس إيه اللي

 باقارنه بالدكتور 

الأب : بتفكري في إيه يا جرة العسل؟

تحمر جويرية خجلا و تقول : أبدا يا بابا .

الاب : طيب يلا انزلي يا بنتي من العربية وصلنا وانتي سرحانه.

وعلى مائدة الغذاء كان الحديث كله يدور حول يوم جويرية وكيف كان ؟ و كان أبوها 

ينظر إليها بجانب عينه ليرى ردة فعلها كلما تحدث عما قام به أحمد لمساعدتها وكانت 

ترتبك وتنظر في طعامها وتصمت على غير عادة ..حتى تضاحكت عليها رانيا والبنات 

وأخذوا يسألوا الأب كيف حدث أن تصمت جويرية هكذا ؟

وعلى الطرف الآخر: استأذن احمد والدته أن يتحدث إليها بعد الغذاء و أخذ يحكي لها ما

 دار بالجامعة وهي تنصت إليه بقلب أم علمت أن ابنها أعجب بابنة الدكتور محمد و

 بالفعل تحدث أحمد كثيرا و سأل أمه في النهاية : أعمل إيه يا ماما؟

الأم : مش البنت عجبتك؟ يبقى خلاص نخطبها و احنا عارفين والدها وعائلتها يبقى

نتوكل على الله

أحمد: على طول كده؟ يعني من غير ما نستنى أو نشوف الدكتور محمد رأيه إيه؟

الأم : تصارح الدكتور محمد بكرة بإعجابك ببنته و إنك عايز تخطبها ونروح نزورهم

في البيت و ربنا يقدملكم كل خير يا ابني

أحمد: ربي يكرمك يا ماما و يتتم الموضوع على خير.

الام : إن شاء الله

7

في منزل الدكتور محمد تجتمع عائلته وعائلة أحمد في زيارة ودية تبشر بالخير و يتآلف

الجميع بكل ود وحب وتتم خطبة جويرية إلى أحمد

النهاية